Жылдызча: Бак-дарактар
ЖЫЛДЫЗЧА Венера Бөлөкбаева
БАК-ДАРАКТАР
(миниатюра)
.22.12.2021.
Таң азандан келиптир.
— Жүрү, бизде эртең мененки тамак таттуу деп эсептелет. Тамактанып келели. Сый тамак берээрде эртең менен эрте чакырабыз…
— Сиз ачкасызбы?
— Жо-о-ок…
— Анда… Тайатамдын бак-дарактарына эле барып келеличи…
— Тайатаңдын бак-дарактары бул жакта жок да?..
— Ооба, жок. Бирок, Тайатамдыкындай бир жерде бар. Ошол жерге баралы…
— Анда жүрү, кеттик…
ХХХ
— Качан, кантип көрүп калдың эле ал талдарды, дарактарды?
— Санаа басып, жерден башымды көтөрө албай келе жатып эсиме келип, эки жагымды карасам эле ошол жерге келип алыптырмын. Салынган үй-жай жок, кыбыраган бир жан жок… Жашарып гана жашыл түстө жашап жатышыптыр.
— Анан?..
— Анан ошо… Балалыгымдагы тайатамдын бак-шагынын арасында жүргөндөй сездим өзүмдү. Аларды жаз, жай мезгилинде кандай көрсөм, так ошондой эмдигиче эсимде жашайт.
— Кыш мезгилиндеги учуру эсиңде калбаптырбы?
— Эсте жок… Кышында үшүп, үрпөйүп үйдөн чыкпаган бала болсом керек. Тайатамдын бакчасын кыш мезгилинде деле көкүрөгүмө, көзүмө толтуруп карап алсам болмок экен…
— Мунуң да бир өкүнүч… Дагы башка өкүнүчтөрүң барбы?
— Толуп жатат…
ХХХ
— Сүйгөнүң барбы?
— Ба-а-ар…
— Ал ким?
— Бирөө…
— Бирөөнүн дареги, ысымы барбы?
— Ысымы бар. Дареги жок.
— Эмне үчүн дареги жок?
— Көчмөн жан… Бир жерге турбайт, жер планетасындагы бүт жерлерди, элдерди кыдырып жүрө берет…
— Анан сен “көчмөн” деп ат коюп алдың беле?
— Өзү деле айтат, “мен көчмөнмүн” деп.
— Кызык экен… Сени сүйөт?
— Жок, мен аны сүйөм…
ХХХ
— Келдикпи?
— Келдик, ушул жер…
— Эми эмне кылабыз?
— Бул бак-дарактарды аралайбыз. Ары-бери басабыз.
— Ошол элеби?
— Асманды да карайбыз, булуттарды да карайбыз…
— Эмне үчүн?
— Суктануу үчүн… Караңызчы, асмандын көп-көгүн… Менин бала кездеги асманым дал ушундай көп-көк эле. Көптөн бери ушундай асманды күтүп жүргөм…
— Чын эле… Асмандын мынчалык сулуу экенин мурда байкабаптырмын.
— Мурда асманды караган эмессизби?
— Карап эле жүргөм. Бирок, мен сулуулуктун баарын жерден эле көрчүмүн, кээ бир айымдардан анан гүлдөрдөн эле…
Рахмат сага… Рахмат тайатаңдыкына окшош бактарга. Мен бүгүн, дал ушул жерден асмандын сулуулугун көрдүм…